У выкананні ўдзельнікаў акадэмічнага клуба «Родник» гучалі вершы і ўрыўкі з твораў класікаў і сучасных беларускіх аўтараў, разважанні вядомых пісьменнікаў і грамадскіх дзеячаў аб ролі і значэнні роднай мовы ў жыцці чалавека. Глыбокі эмацыянальны водгук, пачуццё еднасці са сваёй Радзімай і культурай выклікалі ў студэнтаў таксама песні на словы песняроў Янкі Купалы і Якуба Коласа «Спадчына» і «Мой родны кут», а таксама песня «Акадэмічны гарадок» (словы Уладзіміра Пакуша, музыка Валянціны Макеевай).

Перад моладдзю выступілі член Саюза пісьменнікаў Беларусі Алеся Цэван і паэт Аляксандр Ведзянееў. Яны гаварылі аб тым, «як важна не толькі размаўляць на роднай беларускай мове, але і думаць на ёй, бо гэта паказчык адукаванага і інтэлігентнага чалавека». Таксама аўтары прачыталі свае вершы, прысвечаныя роднаму слову, Радзіме, блізкім людзям і сябрам («Роднае», «Мова мая…», «Не згараючы», «Дзень вясновы», «Наша мова», «Вандроўнікі», «Суразмоўніца» і інш.). Студэнты з задавальненнем слухалі паэтаў, цікавіліся іх творчасцю, задавалі пытанні.

Супрацоўнікі цэнтральнай бібліятэкі імя Максіма Гарэцкага падрыхтавалі тэматычную выставу «Святло роднага слова».