Удзельнікі акадэмічнага клуба «Родник» распавялі прысутным аб жыцці і творчасці класіка, яго шматграннай літаратурнай спадчыне, а таксама аб яго падарожжах ў Горкі, дзе ён сустракаўся са сваімі роднымі, студэнтамі, выкладчыкамі акадэміі. Душэўна і пранікнёна прагучалі вершы Уладзіміра Караткевіча «У векавечнай Бацькаўшчыне клёны…», «Мір гэтаму дому…», «Дзяўчына пад дажджом», «Я чакаў цябе тысячы год…» і інш.

Наталля Ніканчук прачытала свой верш-прысвячэнне Уладзіміру Караткевічу і падзялілася разважаннямі аб яго творчасці, адзначыўшы ролю класіка ў стварэнні такога жанру як беларускамоўны гістарычны дэтэктыў. «Я ўпэўнена, што наша моладзь, як і мы раней, будзе зачытвацца «Дзікім паляваннем караля Стаха» і з вялікім задавальненнем глядзець цудоўныя мастацкія фільмы, знятыя з удзелам Уладзіміра Караткевіча, слухаць аўдыёзапісы спектакляў, адчуваць яго прысутнасць у сённяшнім дні», – адзначыла пісьменніца.

Супрацоўнікамі цэнтральнай бібліятэкі імя Максіма Гарэцкага была прадстаўлена літаратурная выстава, на якой экспанаваліся творы Уладзіміра Караткевіча, даследчыя матэрыялы аб жыцці і творчасці класіка, успаміны аб ім сваякоў, сяброў, літаратараў, гісторыкаў і інш.