Караткевіч – гэта цэлая эпоха ў беларускай літаратуры. Гэта магутны голас гісторыі, які застаўся жыць у яго раманах-эпапеях, і захапляльныя сюжэты дэтэктываў, што праніклі ў самае сэрца беларускай міфалогіі. Гэта пяшчотная лірыка вершаў і вострая публіцыстыка, пошук нацыянальнай ідэнтычнасці і ўсясветны гуманістычны боль. Караткевіч – гэта мастак, які вярнуў беларусам іх гісторыю, паказаў яе не як летапіс пакорлівасці, а як эпас барацьбы і годнасці, укараніў у нацыю любоў да роднай мовы і пераканаў, што мы – народ з вялікім мінулым і яшчэ большым будучым.

Да юбілею пісьменніка бібліятэкі сеткі падрыхтавалі выставы: «Вядомы майстар гістарычнай прозы», «Быў. Ёсць. Буду», «Сын Зямлі пад белымі крыламі», «Уладзімір Караткевіч: асоба і творчасць», «Жывапіс словам». На гэтых экспазіцыях прадстаўлены яго кнігі і літаратурна-крытычныя матэрыялы. Асноўны акцэнт зроблены на тым, каб паказаць багатую і разнастайную літаратурную і культурную спадчыну пісьменніка, яго ўплыў на беларускую гісторыю і сучаснасць. Чытачы могуць акунуцца ў свет адметных гісторый, якія пранікаюць у самыя глыбіні душі і назаўжды застаюцца ў сэрцы.

Уладзімір Сямёнавіч здолеў бліскуча праявіць сябе ў паэзіі і мастацкай прозе, публіцыстыцы і крытыцы, перакладчыцкай справе, драматургіі для тэатра, оперы і кіно. Стаў адной з найбольш яркіх фігур у беларускай літаратуры XX стагоддзя. Ён падняў у сваёй творчасці шырокія пласты нацыянальнай гісторыі, перадаўшы дух мінулых эпох. У сваіх творах яму ўдалося стварыць вядомыя характары і раскрыць багаты духоўны свет герояў. Пісьменнік узбагаціў беларускую літаратуру як у тэматычным, так і ў жанравым плане, напоўніў яе інтэлектуальным і філасофскім зместам.

Ён стаў сапраўдным майстрам гістарычнай прозы, адным з самых яркіх і таленавітых пісьменнікаў Беларусі, чыя творчая спадчына і сёння з’яўляецца крыніцай натхнення для многіх чытачоў і даследчыкаў. Чаму кнігі Уладзіміра Сямёнавіча папулярныя і ў наш час? Аўтар быў верны свайму літаратурнаму крэда: «Кожную кнігу трэба пісаць так, нібы гэта твая лепшая і апошняя». І сапраўды, Караткевічавым словам гаворыць з усім светам душа Беларусі.