Пісьменнік-юбіляр
«Любіць прызначана мне лёсам…»
|
|
Плача люты зусім не з папроку… Басанож стрэла Бесядзь гасцей. — Тыя словы, што зняў з дум прарочых, Як святло льюцца ў душы людзей… |
| Лідзія Андрэева | |
“Горкі – адзін з маіх самых любімых гарадоў. Ёсць там нейкая своеасаблівая аўра, светлая і чыстая. Можа, таму, што ў гэтым горадзе шмат прыгожых інтэлігентных людзей з адухоўленымі тварамі і яснымі вачыма, можа, таму, што ягонымі вуліцамі хадзілі і думалі волаты беларускага духу браты Гарэцкія, а магчыма, проста сваю высакародную справу робіць слаўная спадарыня Гісторыя…” – пісаў Алесь Пісьмянкоў у адным з сваіх артыкулаў.
“Любіць прызначана мне лёсам…” – гэтыя лірычныя радкі паэта ляглі ў аснову вечарыны, прысвечанай памяці выдатнага беларускага паэта Алеся Пісьмянкова, падрыхтаванай супрацоўнікамі Цэнтральнай бібліятэкі імя М. Гарэцкага і Горацкага раённага гісторыка-этнаграфічнага музея.
Ён пражыў усяго 47 гадоў, заўчасна пайшоў з жыцця, але яго паэзія, яго творчая спадчына папоўнілі залаты фонд сучаснай беларускай літаратуры.
Аповед аб жыццёвым і творчым шляху, адметнасці мастацкіх твораў паэта суправаджаўся яго вершамі, якія дэкламавалі ўдзельнікі акадэмічнага клуба “Дэбют”. Гучалі і ўспаміны былога дырэктара Горацкага музея Уладзіміра Ліўшыца, які зараз жыве ў Ізраілі, дзякуючы якому Алесь Пісьмянкоў упершыню наведаў Горкі і з таго часу палюбіў наш горад, неаднаразова тут бываў, а таксама прафесара кафедры сельгасмашын, паэта Аляксандра Клачкова. Уражлівымі і запамінальнымі былі выступленні аднакурсніка Алеся Пісьмянкова, былога выкладчыка кафедры рускай і беларускай моў Пятра Іванавіча Малько, дацэнта гэтай кафедры Ганны Іванаўны Малько, галоўнага бібліятэкара БДСГА Марыі Міхайлаўны Студневай, а таксама члена Саюза беларускіх пісьменнікаў, народнага літаратурнага аб’яднання “Роднае слова”, актыўнай удзельніцы абласнога фестывалю паэзіі і аўтарскай песні “Пісьмянкоў луг” Лідзіі Андрэеўны Мініч.
Да гэтай вечарыны была падрыхтавана аднайменная выстаўка літаратуры, на якой экспанаваліся зборнікі вершаў Алеся Пісьмянкова з уласнымі аўтографамі, літаратурна-крытычныя артыкулы, фотаздымкі, зборнік вершаў горацкіх аўтараў, прысвечаных паэту і інш. Дзякуючы ёй кожны з прысутных мог бліжэй пазнаёміцца з жыццёвым і творчым шляхам пісьменніка.
Паэта сёння няма з намі, але засталася яго сапраўдная, жыццесцвярджальная паэзія, якую ён дарыў нам на радасць і шчасце, каб мы ў цяжкія хвіліны не забывалі пра самае светлае і добрае на зямлі.
