Менавіта пра гэтыя настроі ў яго творчасці і ішла размова на мерапрыемстве ў даніну памяці паэта пад назвай «У зачараваным царстве…», якое падрыхтавалі і правялі супрацоўнікі цэнтральнай і раённай дзіцячай бібліятэк, а таксама, выдатна патрапіўшыя ў пачуццёвы настрой творчасці пісьменніка, таленавітыя дзяўчаты з тэатральнай студыі «Светлячок» пад кіраўніцтвам Сідлеравай Алены Іванаўны.

Знаёмства з жыццёвым і творчым шляхам пісьменніка перамяжоўвалася гучаннем яго твораў у выкананні Калтуненка Марыі, Ягоркінай Дзіяны, Тарасенка Алены, Кішкун Настассі. Удзельніцы тэатральнай студыі ўнеслі вялікі эмацыянальны зарад у гэта мерапрыемства. Вершы, якія дэкламаваліся («Вершы, мае вершы…», «Скірпуся», «Слуцкія ткачыхі», «Бяседная» і іншыя), гучалі пранікнёна і з натхненнем, арганічна спалучаліся з агульным матывам вечарыны і выклікалі ў гледачоў дружныя воплескі.

На працягу гэта мерапрыемства, ды і надалей у раённай дзіцячай бібліятэцы будзе працаваць літаратурная выстаўка, прысвечаная жыццю і творчасці паэта «Чалавек надзіва лагоднай і ўзнёслай душы ... ». Цэнтральнае месца на ёй займае адзіная прыжыццёвая кніга вершаў «Вянок» - дакладная копія выдання 1913 года з захоўваннем тагачаснай мовы напісання, а таксама і іншыя кнігі твораў Максіма Багдановіча і пра яго.

Хочацца спадзявацца, што той узнёслы настрой, які панаваў на мерапрыемстве, закрануў глыбокія віры душ усіх прысутных, уліў у іх свежыя струменьчыкі любові Бацькаўшчыны, народа, мовы…