Яго творы прасякнуты любоўю да роднай зямлі, павагай да чалавека працы, глыбокім разуменнем лёсу народа і памяццю пра ваенныя выпрабаванні. Пісьменнік умеў тонка перадаваць унутраны свет сваіх герояў, іх перажыванні, надзеі і жыццёвую мудрасць. Яго кнігі і сёння застаюцца актуальнымі, бо закранаюць вечныя тэмы чалавечнасці, сумлення, дабра і адказнасці перад гісторыяй.

Да 90-годдзя з дня нараджэння пісьменніка ў бібліятэках сеткі былі арганізаваны тэматычныя кніжныя выставы: «Память нужна живым», «Жыццё, багатае творчасцю», «Лёс пакалення ў творчасці пісьменніка», «Вітаем цябе, беларуская кніга». На выставах былі прадстаўлены вядомыя мастацкія і публіцыстычныя творы Барыса Сачанкі, матэрыялы пра яго жыццёвы і творчы шлях.

Пісьменнік жыў актыўным грамадскім і творчым жыццём; сучаснасць, зменлівая, рухомая, не пакідала ў спакоі яго мастацкае ўяўленне. Адсюль яго няўрымслівасць, імкненне да новага, прага пошуку.

Барыса Іванавіча ведаюць не толькі як цудоўнага празаіка, але як і крытыка, публіцыста, перакладчыка, актыўнага грамадскага дзеяча, які, не шкадуючы сваіх сіл і здароўя, працаваў на адраджэнне нашай Бацькаўшчыны.

Барыс Сачанка працаваў на розных пасадах: рэдактарам аддзела прозы часопіса «Полымя», сакратаром праўлення СП Беларусі, загадчыкам аддзела перакладной замежнай літаратуры выдавецтва «Мастацкая літаратура». З 12 студзеня 1993 года Барыс Іванавіч з’яўляўся галоўным рэдактарам выдавецтва «Беларуская Энцыклапедыя».

Творчасць Барыса Іванавіча Сачанкі — гэта значны ўклад у беларускую літаратуру і культуру. Ён быў таленавітым пісьменнікам, мудрым чалавекам і сапраўдным патрыётам сваёй краіны. Для беларусаў Барыс Сачанка быў і застаецца адным з тых аўтараў, чыя літаратурная спадчына захоўвае дух народа і перадае яго наступным пакаленням.