Найбольшую вядомасць і любоў самай удзячнай аўдыторыі — дзіцячай, — яму прынеслі казкі і фантастычныя творы для дзяцей, якія прасякнутыя наскрозь беларускасцю, сакавітай мовай, аналагаў якой няма ў сучаснай дзіцячай літаратуры, і аздоблены цёплымі добрымі ілюстрацыямі. Гэта, напрыклад, «Грот афаліны» (1985 г.), дзеянне якога адбываецца на востраве пад назвай Рай, і распавядаецца пра сяброўства дэльфіна з чалавекам.

Захапляльныя сюжэты таксама ў такіх дзіцячых творах, як «Прыгоды Бульбобаў» (1977 г.), дзе расповед ідзе ад імя шчанюкоў, і, канешне ж, «Эрпіды на планеце Зямля» (1987 г.), пра тое, як на нашу планету прылятаюць разведчыкі-робаты іншай цывілізацыі. А ягоныя «Навасёлы» былі сапраўдным бестселерам (калі б у СССР было такое паняцце).

Пісаў Місько і казкі — «Прыйдзі, дзень-залацень» (1993 г.), дзе распавядаецца аб прыгодах і сталенні хлопчыка Ваняткі, і «дзіцячую публіцыстыку» — «Зямля ў нас такая» (1974 г.).

Творчасць Паўла Місько здзіўляе колькасцю сюжэтаў, назапашаных не толькі з асабіста перажытага, але і са шматлікіх назіранняў над жыццём падчас журналісцкіх вандровак. Не бракавала яму і творчай фантазіі. Яго жыццёвая біяграфія багатая на падзеі, а творчая – на дзівосна разнастайныя сюжэты, варыянты жанравых форм, адметнасць выбару тэм, персанажаў, падзей.

Да 90-годдзя з дня нараджэння беларускага празаіка, паэта, драматурга, публіцыста, перакладчыка Паўла Місько бібліятэкі сеткі падрыхтавалі змястоўныя выставы да юбілейнай даты: «Неверагодныя прыгоды з Паўлам Місько», «Паміж мінулым і будучым», «У стыхіі роднага слова», «Вандроўкі і прыгоды Паўла Місько», «Незвычайныя прыгоды для звычайных дзяцей».

Прыгодніцкія і фантастычныя сюжэты, яркія персанажы, жвавая і сакавітая мова сустракаюць чытача на старонках кніг Паўла Місько. І хоць падзеі часам адбываюцца ў самых незвычайных мясцінах на Зямлі і ў космасе, творы пісьменніка дапамагаюць нам лепш спазнаць сябе, свой нацыянальны характар і свой родны край.

Яго творы нясуць дзецям дабрыню і беларускае светабачанне, дапамагаюць быць беларусамі з дзяцінства. На нашу думку, калі дзеці будуць чытаць такія кнігі, якія напісаў Павел Місько, то яны вырастуць сапраўднымі беларусамі.