Уладзімір Іванавіч нарадзіўся на Слонімшчыне ў сялянскай сям’і. Яго бацька рана памёр, маці цяжка хварэла, таму дзяцінства Валодзі прайшло ў інтэрнатах. Ён вельмі чакаў канікул, каб паехаць да дзеда ў вёску. А там – лес, птушкі, звяры, – цудоўны свет прыроды, які вабіў яго.

Творчасць У. І. Ягоўдзіка вельмі разнастайная – гэта казкі і апавяданні, аповесці і мініяцюры аб нашай прыродзе і гістарычнай спадчыне. У творах пра гістарычнае мінулае Беларусі аўтар знаёміць нас са славутымі продкамі, запрашае зазірнуць у даўніну, каб даведацца як ствараліся гербы гарадоў Беларусі. Сваеасабліва, з вялікай любоўю апісвае раслінны і жывёльны свет, якім захапляецца бязмежна.

Раскрыццю мнагаграннасці талента пісьменніка ўдала садзейнічаюць кніжныя выставы, якія аформлены ў бібліятэках сеткі да юбілею пісьменніка: «Аматар і знаўца прыроды», «Мір прыроды У. Ягоўдзіка», «Цудоўны свет Ягоўдзіка», «Падарункі ад дзяцькі Ягоўдзіка», «Адкрываем мір прыроды з кнігамі У. Ягоўдзіка», «Скарбы Радзімы, або Чароўны свет Уладзіміра Ягоўдзіка», «Чароўны свет зямлі», «Зачараванне беларускай прыродай». Творы У.І. Ягоўдзіка прадстаўленыя на выставах дапамагаюць юным чытачам адчуваць прыгажосць нашай прыроды, глыбока пранікаць у яе чароўны свет. Не менш цікавымі з’яўляюцца кнігі аўтара пра гістарычнае мінулае нашай краіны, а таксама казкі.

У філіяле «Саўская сельская аб’яднаная бібліятэка» прайшоў агляд кніг «Скарбы Радзімы». Школьнікі даведаліся пра творчасць пісьменніка, яго кнігі, яшчэ раз успомнілі факты, якія ён раскрывае ў сваіх творах: дзе жыве бабёр, каго называюць «санітарам леса», след якой жывёлы падобны на чалавечы і інш. Мерапрыемства прайшло цікава і пазнавальна.

Уладзімір Іванавіч – сапраўдны беларус, улюблёны ў сваю краіну, яе людзей, яе дзетак, таму яго творы пішуцца ім на даступнай, каларытнай роднай мове, іх з задавальненнем чытаюць і дзеці, і дарослыя. Усім чытачам зразумелы склад яго твораў. Адна з асаблівасцей яго кніг – гэта цудоўныя фотаздымкі і ілюстрацыі.

Уладзімір Іванавіч Ягоўдзік – гэта цудоўны сябар прыроды і беларускай культуры. Яго творы нястомна дапамагаюць людзям лепш разумець і шанаваць нашу зямлю. Мільёны чытачоў шануюць яго за працавітасць і прыгажосць слова. Жадаем яму здароўя і новых здзяйсненняў у яго творчай дзейнасці!